An 19.August 1943 bünn ik in Wohlsdörp to Welt komen. Dat Huus leeg an Rand vun uns Dörp twischen den Lanker See un een groot Holt. De Deel vun't Dörp nöömt
sik Olenhhööven wiel dat dor in fröher Tieden wull een Woterslott stohn hett. Op de anner Siet vun den Lanker See is de holsteensche Stadt Preetz.
Wi harrn een lütt Landsteed mit Köh, Swien, Höhner, Aanten, Kaninken un watt dor sünst noch an Deerten givt. Un mien Kinnertiet merrn in de Natur keem wi
vör wie in een Paradies. Ik harr vele Süstern un Bröder, de avers ni mehr to Huus weren. Opwussen bün ik mit een Süster un een Broder, de acht un söven Johr öller as ik sünd. To Huus hebbt
wi blots Plattdüütsch snackt. As ik in de School keem, heff ik de Schoolmeestersche toerst ni verstohn. Hochdüütsch heff ik denn avers gau lehrt. No de veerte Klass heff ik de School wesselt un
bün in't Gymnasium in Preetz komen. 1964 heff ik dor dat Abitur bestohn. No de Soldotentiet un mien Studium an de Padagögische Hochschool in Kiel weer ik vun 1968 bet 2006 Schoolmeester an de
Realschool in Alversdörp in Dithmarschen. Meistendeels heff ik Mathematik, Physik un Chemie ünnerricht. Vun 2006 bet hüüt heff ik mi veel mit uns plattdüütsche Moddersprook befot. Vör
twintig Johr hebbt een poor Lüüd un ik den Alversdörper Plattdüütschen Krink int Leven ropen. Ik schriev plattdüütsche Geschichten un ok Gedichte. De will ik Ju nu hier op düsse Sieden
publik moken.
AVERS: IK BÜNN KEEN SCHRIFTSTELLER! IK BÜNN EEN AMATEUR, DE FREUD AN'T SCHRIEVEN HETT!!!
